តូក្យូ៖ យន្តហោះចម្បាំងប្រភេទ F-15 របស់ទ័ពអាកាសជួរមុខជប៉ុនបានបាត់ជាមួយនាវិក២នាក់ក្រោយហោះចេញពីមូលដ្ឋានទ័ពអាកាស Komatsu។

ក្រសួងការពារជាតិជប៉ុនបានឱ្យដឹងថា យន្តហោះរបស់កងកម្លាំងស្វ័យការពារដែនអាកាសជប៉ុនបានបាត់ខ្លួនពីរ៉ាដា កាលពីថ្ងៃច័ន្ទភ្លាមៗបន្ទាប់ពីការហោះឡើងចម្ងាយប្រហែល ៥គីឡូម៉ែត្រពីមូលដ្ឋានទ័ពអាកាស Komatsu នៅលើឆ្នេរសមុទ្រជប៉ុន។

បច្ចុប្បន្នឧទ្ធម្ភាគចក្រកំពុងបន្តស្វែងរក និងជួយសង្គ្រោះ ខណៈនាវាឆ្មាំឆ្នេរសមុទ្រចំនួនបីបានបន្តការស្វែងរក បន្ទាប់ពីបានរកឃើញបំណែកយន្តហោះមុននេះនៅក្នុងសមុទ្រ។

យន្តហោះប្រភេទ F-15 ភាគច្រើនដែលហោះហើរដោយប្រទេសជប៉ុនគឺស្ថិតក្រោមអាជ្ញាប័ណ្ណដោយក្រុមហ៊ុន Mitsubishi Heavy Industries ហើយវាជាយន្តហោះចម្បាំងជួរមុខដ៏សំខាន់របស់ប្រទេសជប៉ុនរយៈពេល ៤ទស្សវត្សមកហើយ៕